牛哥講經丨廣東話哲學、書籍分享

原片：https://www.youtube.com/live/N4YTHF_lPyY?si=edomDvFDPqCKJfSZ
如果你有機會親手接觸人嘅大腦，你知唔知最緊要做咩動作？
《神經可塑性》嘅作者，神經科學家妮可・維諾拉從教授得到嘅提醒係：記住要不停轉動人腦，先唔會喺上面留低指紋。
呢個道理，除咗喺大腦研究上有用，喺我哋使用自己嘅大腦嘅時候，亦同樣適合——我哋需要得閒郁下我哋個腦，如果唔係，個腦就會因為長期停留喺某處，而得到印記。言下之意，係咪講緊我哋平時個腦唔係點郁？的確如此。
如果我哋當大腦係硬件，而大腦當中嘅記憶、思想、習慣同行為係軟件，咁活用大腦嘅時候應該關注硬件定軟件？答案係，both，兩者都需要健康咁運行，就好似一部新macbook，都要行最新嘅word檔，先可以顯出科技嘅方便。但係，如果部新macbook一次過運行緊好多個程式，咁佢開一個新程式嘅時候，可能會lag，因為佢要維持原本嘅運作已經好busy。電腦「運行緊好多個程式」，會lag，人腦亦都有好多習慣喺你無意識到嘅情況下運行緊，習慣聽落係軟件嘅事，但其實習慣更會刻喺你個腦入面——神經元嘅連結。
「每個神經元建立的這些連結（肉眼看不見）決定了你將如何度過一天，而且它們是按照你的生活方式進行編程的。它們也是由我們的同儕和前人預先編程的。這讓我意識到，如果我們不掌控我們生活的方向盤，我們本質上就是過著別人為我們編程的生活。」

可能會有唔少人對「過著別人為我們編程的生活」有住同感。好多人以為，人老咗，個腦就似乾咗嘅水泥咁，定晒型、改唔到。
有一啲朋友，覺得自己被生活「困死」咗。佢哋做緊一份好討厭嘅工，但又覺得：「唉，命嚟嘅，我成世人淨係識做呢樣，仲可以點？」可能佢細細個讀工程，身邊啲人就同佢洗腦，話佢個腦淨係識「分析」、無「創意」，結果佢就算心入面幾想試下藝術、試下創作，佢都唔敢跨出嗰一步，因為佢真心相信自己「唔係創意嘅材料」。

當我哋話習慣更會刻喺你個腦入面、「過著別人為我們編程的生活」嘅時候，唔知你會唔會覺得好得人驚呢？咁又唔使太驚，因為咁樣只係顯示緊我哋嘅大腦係plastic，唔係講緊你個腦膠，而係你個腦係可塑。
「希臘文的plastikos，而後者意指能夠塑形的」

我哋個腦係有一種超能力，叫「神經可塑性」（Neuroplasticity）。雖然大家平時講「整容手術」（Plastic Surgery），直覺就係諗起執靚個樣、整到成個babe咁，但其實呢個詞嘅本意係「塑造」。大腦「塑造」對我哋嚟講簡直係大福音——因為佢話畀我哋聽，我哋個腦嘅「硬件」係可以升級嘅！只要你肯去郁佢，你係絕對有能力揼低嗰啲衰習慣，或者擺脫嗰啲你自以為改唔到嘅行為。

——只要你肯開始嘗試新嘅嘢，你個腦入面嘅神經元就會自己搵路、重新開多幾條線路出嚟。佢哋因為唔知自己可以改，結果連試都唔試，就咁輸咗畀個標籤。

「這些自動的想法被一遍又一遍地重複，在我們大腦的溝通路徑中得到加強，從而塑造了你的思維方式。但我在這裡要告訴各位，我們是可以創造新的路徑和改變這些信念的。本書準備你展示這是如何做到。」
今集內容包括以下部分：

第一大部分：神經重塑理論背景
自動性與突觸溝通 
童年人格發展與觀察性知識
專走捷徑的大腦

第二大部分：分清壓力點解咁重要？
三種壓力
警覺性壓力
急性壓力
適應不良性壓力

提示：三月八日有線下讀書組！

《新編中國哲學史》應該係喺香港最出名／最多人讀過嘅哲學史，亦都唔少人對呢本書評價唔錯。我當初第一次讀完《新編中國哲學史》之後，都覺得呢本書顯出咗哲學史應該有嘅清晰。老實講，呢本書我已經放低咗好多年，因為之後都再無咩機會睇返佢。
如果大家有機會睇唔同嘅學術論文，你應該會發現一個有趣現象——馮友蘭，甚至係胡適嘅哲學史都間唔中有人會引用下，但勞思光嘅哲學史，我印象中係極少人引。一直以嚟我都無好關心呢個現象點解會出現，只係大概覺得學界對香港出產嘅哲學家無太多關注。

最近，我又抱有返個使命感，想同大家分享有系統嘅中國哲學，之前講過胡適嘅《中國哲學史大綱》，今日就講勞思光嘅《新編中國哲學史》。

嘗試教導他人，呢個行為果然係最好嘅老師，預備講述勞思光嘅《新編中國哲學史》嘅過程當中，我發現自己對勞思光嘅工作有咗新嘅認識——勞思光模仿康德，為哲學史畫界。
今次呢個系列叫做《純粹《新編中國哲學史》批判》，呢個名當然係源自於康德嘅《純粹理性批判》。如果大家對康德哲學有認識，應該會知道「純粹」同「批判」喺康德語境下，係有特殊意涵，我用嘅係鄧曉芒嘅翻譯：
「它是對理性的籲求，要求它重新接過它的一切任務中最困難的那件任務，即自我認識的任務，並委任一個法庭，這個法庭能夠受理理性的合法性保障的請求，相反地，對於一切無根據的非分要求，不是通過強制命令，而是能按照理性的永恆不變的法則來處理，而這個法庭不是別的，正是純粹理性的批判。但我所理解的純粹理性批判，不是對某些書或體系的批判，而是對一般理性能力的批判，是就一切可以獨立於任何經驗而追求的知識來說，因而是對一般形而上學的可能性和不可能性進行裁決，對它的根源、範圍和界限加以規定，但這一切都是出自原則。」（第一版序，頁xxxii）所謂批判，就係建立理性嘅法庭，審視一套知識嘅根源、範圍同界限；

而所謂純粹，康德講到：「但先天知識中那些完全沒有摻雜任何經驗性的東西的知識則稱為純粹的。」（導言，頁2）所以，純粹就係指無雜質。

如果要我用一句說話總結勞思光喺《新編中國哲學史》嘅工作，就係〔去除原始或古代思想當中嘅雜多觀念，為中國哲學嘅根源、範圍同界限加以規定，澄清中國文化精神方向〕。
你有咗呢個框架，就會明白勞思光係用咩基準嚟判斷乜嘢係哲學。
先旨聲明，我唔同意勞思光嘅理解，我喺會員podcast以及學識課程《從巫師走到儒家—上古中國文化史》已經多番強調認識中國上古文化對我哋理解中國哲學精神係極為重要。但我唔會因人廢言，或者因為立場唔同就矮化對方，相反，我認為勞思光精神可嘉，所以我會嘗試呈現出佢呢種做法嘅優點，然後從我嘅立場作出回應。
為咗理解勞思光嘅觀點，我哋會一齊閱讀第二章，〈古代中國思想〉。

今集內容包括以下部分：

原始雜多
古代中國之思想要點
《詩經》：形上天
易經：宇宙論
書經：政治理想
原始信仰
人格天
神鬼
命

上次，我哋講到各地唔同族群開始將啲野生植物慢慢馴化。其實古人行出呢步大棋嗰陣，根本係蒙查查，完全唔能夠預知個結果會點。佢哋唔係計劃幾千年後要建立咩大帝國、發明咩文字；佢哋只係單純想搵多啖飯食，填飽個肚。結果，徹底改寫人類嘅命運——自己嘅生活方式會由「周圍走」變成「定死喺度」，亦決定咗佢哋子孫後代喺歷史上坐咩位置——係做手執洋槍嘅征服者，定係做被病菌同鋼鐵蹂躪嘅土著（被征服者）。
而我哋要面對呢本書最核心嘅謎題之一：點解農業嘅發展咁唔公平？
如果我哋打開地圖睇下，地球上其實有好多地方環境極之優越。例如美國嘅加州、氣候溫和嘅歐洲、澳洲嘅東南部，甚至係赤道以南嘅非洲。呢啲地方土地肥沃、風涼水冷、陽光充足。以今日嘅眼光睇，加州係世界級嘅大糧倉，歐洲嘅葡萄園多到數唔晒。

但係好奇怪，喺古代，呢啲「風水寶地」竟然係農業嘅荒漠。住喺呢度嘅原住民，雖然守住咁靚嘅地，但係幾千年嚟都係靠打獵同採集維生，完全發展唔出農業。相反，有啲睇落無咁靚嘅地方，例如中東嘅乾旱地帶（新月沃土），反而快人一步，理想達到，開始咗糧食生產。

點解個時間表會差天共地咁遠？點解有啲族群可以喺萬年前就開始起步，有啲就要等到幾千年後，甚至要等外人入侵先識得種田？

我哋亦都可以跟住作者思考，美國原著民馴化唔到蘋果，係邊度出錯咗？今集內容包括以下部分： 人廢，定地廢?：簡介文化決定論同環境決定論 農業無得揀： 農業謎題： 新月沃土的優勢： ———————————— 輸在起跑線嘅輸家： 總結：

睇《單身即地獄》嘅時候
成日見到男女嘉賓一去到天堂島就問對方：
「你理想型係咩？」
我就喺度諗：
要了解一個人，知道佢嘅理想型到底重唔重要呢？
到底理想型之於對愛情嘅想像，係好事定壞事呢？
諗諗下
我覺得「理想型」似乎係用緊柏拉圖故事當中嘅「人球神話」
但「人球神話」當中所講嘅唯一、完美
並唔適用於凡人嘅愛情
「人球神話」下
我哋總會將自己嘅期望投射到對象身上
佢要如何高如何矮
佢要如何靚如何聰明搵到自己嘅命中註定就係搵到達到所有條件嘅某某
彷彿愛情係一場條件滿足嘅尋覓對象早在某處
對象被我所決定
對象被我所尋找
但凡人嘅愛情
會發現對方總有缺點
佢唔係完美劃一、等待被人從貨架上揀選嘅商品最初，彼此嘅結合未必可以構成完美「人球」但彼此能夠互相欣賞、成長
最終要構成嘅
係彼此認定嘅形狀而非註定嘅面目
其實，人球神話並非出自代表柏拉圖思想嘅角色
柏拉圖之於愛情，有更深刻嘅理解佢以女祭司狄奧提瑪同蘇格拉底道出箇中思考“For love, Socrates, is not, as you imagine, the love of the beautiful only." 
"What then?" 
"The love of generation and of birth in beauty.”－－Translated by Benjamin Jowett
愛，唔係因為對方為美、要佔有其美。
而係要為對方建構、孕育美。

本月主題：理想型
兩個建議方向：
你對於伴侶嘅理想型係點？你現實中嘅伴侶合唔合乎理想型？
你相唔相信有「靈魂伴侶」？
主題只係提議，你可以按呢個題目投稿，亦可以按自己心中所定嘅題目書寫。
期望見到你嘅作品！
「牛言信箱」將於2月4日（星期三）夜晚九點開始。

漢譯《金剛經》有最少六種唔同版本：
一、姚秦：鳩摩羅什譯本（約公元四O一至四一三年）

二、北魏：菩提流支譯本

三、南朝陳代：真諦譯本

四、隋朝：達摩笈多譯本

五、唐代：玄奘譯本

六、唐代：義淨譯本

結果，得到廣泛流傳嘅，係最古老嘅鳩摩羅什譯本，亦即係話，往後無一個譯本能夠取代鳩摩羅什嘅版本。
鳩摩羅什嘅翻譯，仿彿係喺淺顯直白嘅語意同艱澀深奧嘅符咒之間遊走，令一部漢譯《金剛經》創造咗漢語文學史上獨樹一幟嘅美麗文體，又稱「譯經體」。

而鳩摩羅什一生傳奇，顛沛流離，佢好似唔單止喺翻譯文字，而係用佢奇幻詭譎嘅人生，帶領漢文世界嘅大眾，深刻領悟「云何應住？云何降伏其心？」

今集，我哋就要睇睇鳩摩羅什嘅翻譯有咩特色，以及《金剛經》同鳩摩羅什人生嘅對應。